මළ මිනිසුන් ගැන ය
නොමියෙන මිනිසුන්ගේ විවාදය
මළ මිනිසුන් ගැන ය
වැළලීම වරදකි
ඇතැමෙක් කියති
ආදාහනය වරදකි
තවෙකෙක් කියති
'ඉඩක් නැත මළවුන්ට
අපේ මේ සුසානය තුළ
වැළකිය යුතු ය
උන් යන අවසන් ගමන
අපේ මේ අරගලය
දිව සැප පිණිස නොව
නොමියෙන සියලු මිනිසුන්ගේ
හිත සුව වෙනුවෙනි'
නොමියෙන මිනිසුන්ගේ විවාදය
මළ මිනිසුන්ගේ ආගම ගැන ය
එහද නැවතී ඇත
ඊයේ උදේ වනතුරු ගැහුණු
එයින් නැඟි හඬ
සීහළ ද දමිළ ද මුස්ලිම් ද දැනගනු
ඒ දැනුමෙන් මැ පමණකි
මෙදිවයින සුරපුරක් කළ හැක්කේ
නොමියෙන මිනිසුන්ගේ විවාදය
මරා දැමුණන්ගේ මරුවන් ගැන ය
'සමහරක් ජීවිත
අනිත් ජීවිතවලට වැඩියෙන්
අගනේ ය වටනේ ය දහසින්
ඒ ඇගැයුම ම ගැනුමෙනි
සාමය-සමාදානය
දස දෙස වපුළ හැක්කේ.'
'වරද යනු මිනිස් ගතියකි
සමාව දීම දේව ගුණයකි
මෙය රුවන් වැකියකි
කීකරු ළමෝ අනුයති.'